చైనా కొత్త రూల్స్.. భారత్ 120 బిలియన్ డాలర్ల ఎలక్ట్రానిక్స్ కల చెదిరిపోనుందా?

కరోనా మహమ్మారి తర్వాత చైనాకు ప్రత్యామ్నాయంగా, ప్రపంచానికి ఒక సరికొత్త గ్లోబల్ తయారీ కేంద్రంగా ఎదగాలని భారత్ గట్టిగా ప్రయత్నిస్తూ వస్తోంది. అందుకు అనుగుణంగా పరిశ్రమలు సిద్ధమవుతున్న తరుణంలో చైనా తన సరఫరా గొలుసుపై (సప్లై చైన్) పట్టును మరింత బిగించింది. ఆ దేశం తాజాగా తీసుకొచ్చిన కొత్త ఎగుమతి నిబంధనల వల్ల భారత్‌లో ఎలక్ట్రానిక్స్, ఆటోమొబైల్ రంగాలు భారీ కుదుపునకు లోనయ్యే అవకాశాలు ఉన్నాయి.

‘డిక్రీ 834, 835’ అస్త్రం
చైనా ప్రభుత్వం ‘స్టేట్ కౌన్సిల్ డిక్రీ 834, 835’ పేరుతో కొత్త నిబంధనలను అమల్లోకి తెచ్చింది. దీని ప్రకారం ఆధునిక సాంకేతికత, కీలక యంత్రాలు, ఖనిజాల ఎగుమతులపై చైనా ఆంక్షలు విధించింది. తమ ఫ్యాక్టరీలను వేరే దేశాలకు తరలించే కంపెనీలు లేదా అధికారులపై చట్టపరమైన చర్యలు తీసుకునేలా ఈ కొత్త రూల్స్ ఉన్నాయి. భారత్‌లోని ఎలక్ట్రానిక్స్ రంగం ఇప్పటికీ చైనా యంత్రాలు, ముడి సరకులపైనే ఎక్కువగా ఆధారపడటం వల్ల మన కంపెనీల్లో ఇప్పుడు తీవ్ర ఆందోళన మొదలైంది.

ఎలక్ట్రానిక్స్ కలలకు బ్రేక్ పడేనా?
భారతదేశ ఎలక్ట్రానిక్స్ ఎగుమతులు 2015లో 8.6 బిలియన్ డాలర్ల నుంచి 2025 నాటికి 47 బిలియన్ డాలర్ల రికార్డు స్థాయికి చేరాయి. ఈ 2026 చివరి నాటికి దీన్ని ఏకంగా 120 బిలియన్ డాలర్లకు చేర్చాలని కేంద్ర ఐటీ శాఖ లక్ష్యంగా పెట్టుకుంది. అయితే యాపిల్ సప్లయర్స్ విస్తరణ, సెమీకండక్టర్ ప్లాంట్ల వంటి ప్రతిష్ఠాత్మక ప్రాజెక్టులకు కావలసిన కీలక విడిభాగాలను చైనా అడ్డుకుంటే ఈ లక్ష్యం నెరవేరడం కష్టంగా మారుతుంది. కార్ల తయారీ రంగంలో కూడా దాదాపు 26 శాతం హైవాల్యూ ఎలక్ట్రానిక్స్ విడిభాగాలు చైనా నుంచే వస్తున్నాయి.

కేంద్ర ప్రభుత్వం ఏం చేస్తోంది?
చైనా చర్యలపై కేంద్ర రక్షణ, వాణిజ్య శాఖ మంత్రి పీయూష్ గోయల్ స్పందించారు. చైనా లాంటి కొన్ని నిర్దిష్ట దేశాలపై ఆధారపడటాన్ని తగ్గించడానికి రంగాల వారీగా పెట్టుబడి ప్రణాళికలను సిద్ధం చేస్తున్నట్లు తెలిపారు. అలాగే తయారీ రంగాన్ని బలోపేతం చేయడానికి రూ.33,660 కోట్లతో ‘భారత్ ఔద్యోగిక్ వికాస్ యోజన’ కింద రాబోయే మూడేళ్లలో 50 ఇండస్ట్రియల్ పార్కులను ప్రారంభించాలని కేంద్రం ప్లాన్ చేస్తోంది.

అసెంబ్లింగ్ కాదు.. సొంతంగా ఎదగాలి
చైనా ఆంక్షలు భారత్‌కు ఒక రకంగా హెచ్చరిక లాంటివని పరిశ్రమ నిపుణులు అంటున్నారు. మనం కేవలం వేరే దేశాల విడిభాగాలను తెచ్చి ఇక్కడ బిగించే స్థాయి నుంచి బయటకు రావాలని సూచిస్తున్నారు. గుజరాత్‌లో భారీ యాక్టివ్ ఎల్‌ఈడీ డిస్‌ప్లే ప్లాంట్‌ను ఏర్పాటు చేసిన ఎల్‌ఈడీఎక్స్ లాంటి కంపెనీలు ఇప్పటికే స్వదేశీ ప్రత్యామ్నాయాలపై దృష్టి పెట్టాయి. కేవలం చైనాను రీప్లేస్ చేయడం మాత్రమే కాకుండా, భారత్ స్వయంసమృద్ధి సాధిస్తేనే గ్లోబల్ మార్కెట్‌లో నమ్మకమైన భాగస్వామిగా ఎదగగలదని నిపుణులు స్పష్టం చేస్తున్నారు.